Сыйпалап таппайсың... Бишкектеги стадионго топтолгон 500дөй адамдын кайда кеткени азырынча белгисиз

Бишкектеги Дөлөн Өмүрзаков атындагы стадиондо көпчүлүк чогулуп жатат деген маалыматтар тараган. Ошондой эле 500дөн ашык адам чогулганын күбөлөр сүрөткө тартып, атүгүл сыртта аларды 2 автобус күтүп жатканын айтышкан. Мындан тышкары чогулгандардын кээ бирлери "Элдик кошуун" деген жазуусу бар кийим кийип алышканын маалымдашкан.

Маалыматты тактоо максатында SUPER.KG порталы аталган стадионго барып, ал жерде эч ким жок экенине күбө болду.

Стадиондо жүргөн адамдардын айтымында, 500дөн ашуун адам чогулганын жана алар тарап кетишкенин билдиришти. Бирок алар кайда кетишкенин, кимдер чогулганын билбей тургандыгын кошумчалап өтүштү.

Ошондой эле милициянын кайгуул кызматкерлери аталган маалымат боюнча стадионго келишкенин айтышты.

Таң эртелеп адамдардын массалык чогулуусу, бир саат ичинде алардын тарап кеткени боюнча Бишкек ШИИББине байланышканыбызда, маалымат такталып жатканын билдиришти.