Салык кызматы унаа салыгын убагында төлөбөгөндөрдү аныктоо үчүн рейд жүргүзө баштады

Мамлекеттик салык кызматы ИИМдин Жол коопсуздугун камсыздоо боюнча башкы башкармалыгынын кызматкерлери менен бирге салык төлөбөгөн унаа ээлерин аныктоо боюнча рейддик иш-чара жүргүзө баштады. Бул тууралуу Салык кызматынын басма сөз кызматынан билдиришти.

Белгилей кетсек, быйылкы жылдын унаа салыгын төлөө мөөнөтү 1-сентябрда аяктаган.

Ал эми салыкты өз убагында төлөбөгөндөргө карата өлкө мыйзамдарына ылайык 1000 сом өлчөмүндө айып пул каралган. Ошондой эле өз учурунда төлөнбөгөн салыктын ар бир күнү үчүн туум эсептелет.

Мындан улам салык кызматкерлери туумдун өсүп кетпеши үчүн унаа ээлерин салыкты кечиктирбей төлөөгө чакырат.

Аталган рейддик иш-чара салык төлөбөгөндөрдү аныктоо үчүн гана эмес, калк арасында түшүндүрүү иштерин жүргүзүү максатында да жүргүзүлүп жатканы айтылат маалыматта.