Пакистандагы кыргыздардын жашаган жерлерин кыдырууну сүйлөштү. Этникалык кыргыздар элчи менен жолугушту (сүрөт)

Пакистанда жашаган этникалык кыргыздардын өкүлдөрү Кыргыз өлкөсүнүн Пакистандагы элчиси Уланбек Тотуяев менен жолугушту. Тышкы иштер министрлигинин маалыматы боюнча жолугушуу 17-сентябрда орун алды.

Жолугушуунун алкагында элчи этникалык кыргыздардын эки өлкөнүн ортосундагы маданий жана тарыхый байланыштарды өнүктүрүүдөгү маанилүү ролун белгилеп, ошондой эле ар кандай укуктук, социалдык жана күнүмдүк маселелерди чечүүдө ар тараптуу жардам көрсөтүүгө даяр экени тууралуу маалымат берди.

Өз кезегинде этникалык кыргыздардын өкүлдөрү Уланбек Тотуяевди элчи болуп дайындалышы менен куттукташып, Пакистанда Кыргыз жергесинин имиджин бекемдөөгө багытталган мындан аркы биргелешкен иштерге кызыкдар экенин билдиришти.

Тараптар этникалык кыргыздардын жана көчүп кетүүнү каалагандардын укуктук сабаттуулугун жогорулатууга багытталган маалыматтык иштерди жүргүзүүгө, Пакистандагы кыргыздардын жашаган жерлерине иш сапарын жакын арада уюштурууну макулдашты.