Бир айылдан болушат. Аксыда эгиз жигиттер эгиздерге баш кошту

Аксы районунун Кашка-Суу айыл аймагында эгиздер Жаныш менен Байыш айылдаштары Апал менен Үпөлгө баш кошушту. Жаш жубайлардын үйлөнүү үлпөт тою Кербендеги тойканалардын биринде өткөн. Бул тууралуу SUPER.KG порталына эгиз кыздардын жеңеси Бегимай Ниязбекова билдирди.

"Кайын сиңдилерим үй-бүлөдө эң кенжелерибиз эле. Экөө тең Майлуу-Суудагы медициналык колледжде окуп, билим алышты. Күйөө балдарыбыз деле өзүбүз жактан. Бир айыл өкмөттөбүз, бирок эки башка айылда, ошентсе деле бир мектепте окушкан.

Бир тойдо таанышып, сүйлөшүп калышкан экен. 3 жыл кыз-жигит болушуп, анан мынтип баш кошуп отурушат. Өздөрү сүйлөшүп, табышкан үчүн ата-энебиз деле баарына макул болду.

Азырынча төртөө тең эле айылда турушат. Кайын сиңдилерим 1999-жылы төрөлгөн, күйөө балдарыбыз 1997-жылкылар. Буга чейин биз жакта такыр мындай окуя болгон эмес экен, сүрөттөрүн интернетке жүктөсөк көптөр кызыгып, бакыт каалап жазып жатышат", - дейт Ниязбекова.