Депутат: "Жүк ташуучу 17 унаага жүктөлгөн аткезчилик алтын концентратын кытайлар чыгарып кетишиптир. Кимдер күнөөлүү?"

Өлкөдө аткезчилик жолу менен ташылып баратканы үчүн кылмыш иши козголгон алтын концентратын Кытайга алып чыгып кетишти. Бул тууралуу бүгүн, 22-сентябрда Жогорку Кеңештин жыйынында депутат Аккулу Бердибаев билдирди.

“17 жүк ташуучу унаага жүктөлгөн аткезчилик алтын концентраты "Эркеч-Тамда" токтотулуп турду эле. Кечээ, 21-сентябрда лицензиясын жаңылады деп “Эркеч-Там” эмес “Достук” бажы өткөрмө пункту аркылуу кытайлар чыгарып кетиптир. Министрлердин, бажынын деңгээлиндеги коррупция токтобой жатат. Кечээ эле мыйзам бузуу боюнча каралды эле. Буга кимдер күнөөлүү? Азыркы Мамлекеттик бажы кызматынын башчысы “Мен билбей калыптырмын. Балдар чыгарып жибериптир. “Достуктан” чыгарып поездге жүктөп кетишиптир” деп айтты. Мындай боло берсе мамлекеттин оңолушу кыйын болот. Ушул маселени карап чыгуу керек. Мунун үстүндө дагы чоң акча жүрүп жатат”, - дейт ал.