"Сыртка экспорттоого лицензия берилген". Алтын концентратынын Кытайга чыгарылып кеткени боюнча Бажы кызматынын түшүндүрмөсү

Мамлекеттик бажы кызматы өлкөдөн 17 жүк ташуучу унаага жүктөлгөн алтын концентраты Кытайга чыгарылып кеткени айтылып жаткан маалымат боюнча билдирүү жасады. Бул тууралуу аталган кызматтын басма сөз кызматы билдиришти.

"Тарифтик эмес жөнгө салуу чаралары колдонулган товарларды экспорттоого байланышкан бажы операцияларын жүргүзүүдө бажы органдары Евразиялык экономикалык комиссиянын 2015-жылдын 21-апрелиндеги №30 чечими боюнча экспорттоого уруксат берүү тартибин жетекчиликке алышат.

Импорт жана экспорт Кыргыз Республикасынын ыйгарым укуктуу мамлекеттик органы тарабынан берилген уруксат кагазынын негизинде гана ишке ашырылат.

Өкмөттүн 2016-жылдын 24-мартындагы №142 токтомуна ылайык, Кыргыз Республикасынын ыйгарым укуктуу органы "КАЙДИ" тоо-кен инвестициялык компаниясына (жоопкерчилиги чектелген коом) 2021-жылдын 26-августунда "флотациялык концентратты" сыртка экспорттоого лицензия берген.

Бажы кызматкерлери жогорудагы чечимге жана өлкө мыйзамдарына ылайык "флотациялык концентратты" чыгарууга байланыштуу бажы операциясын жүргүзүшкөн", - деп айтылат билдирүүдө.

Эске салсак, кечээ, 22-сентябрда Жогорку Кеңештин жыйынында Аккулу Бердибаев аткезчилик жол менен алтын концентратын Кытайга алып чыгып кетишкенин айтып чыккан.