Америка Кыргыз өлкөсүнө COVID-19га каршы вакциналарды кошумча берүүгө даяр экенин билдирди

22-сентябрда Нью-Йорк шаарында тышкы иштер министри Руслан Казакбаев АКШнын мамлекеттик катчысынын жардамчысы Дональд Лу жана президенттин улуттук коопсуздук боюнча улук жардамчысы Эрик Грин менен жолугушту. Бул тууралуу аталган министрликтин басма сөз кызматынан билдиришти.

Жолугушуунун башында Руслан Казакбаев Дональд Луну жогорку кызматка дайындалышы менен куттуктады.

Жолугушуунун жүрүшүндө тараптар "С5 + 1" форматындагы министрлер жолугушуусунун жыйынтыктарын, ошондой эле эки тараптуу мамилелердин башка актуалдуу маселелерин жана регионалдык күн тартибин талкуулашты.

Америкалык тарап Кыргыз өлкөсүнө COVID-19га каршы вакциналарды кошумча берүүгө, ошондой эле демократиялык институттарды андан ары бекемдөө менен бирге ар түрдүү чөйрөлөрдө мындан ары кызматташууга даяр экендигин жарыялады.

Кыргызстанда ооганстандык студенттерди кабыл алуу боюнча жүргүзүлгөн иштер позитивдүү кабыл алынып, кыргыз тарабы студент аялдарды кабыл алууга артыкчылык бериле тургандыгын белгиледи.

Өз ара пайдалуу, айрыкча соода-экономикалык чөйрөдөгү долбоорлорду биргелешип иштеп чыгуу үчүн тыгыз байланышта болуу жөнүндө келишүүлөргө жетишилди.