Баткенде Кыргыз-Тажик окуучуларынын жаңжалы орун алды. Окуянын чоо-жайы

Бүгүн, 23-сентябрда саат 13:00 чамасында Баткен районунун Көк-Таш айылынын Дахма жерлигинде мектептен келе жаткан төрт кыргыз окуучусун тажик айылынын 11-классынын 30га жакын окуучусу ур-токмокко алышкан. Бул тууралуу Баткен райондук мамлекеттик администрациясынын басма сөз кызматынан билдиришти.

Маалыматка ылайык, натыйжада 4 кыргыз окуучусу денелеринен түрдүү жаракат алып, ооруканага жеткирилген.

"Кыргыз окуучуларынын атасы жана туугандары балдарды ур-токмокко алган тажик окуучуларынын экөөсүн жана алардын ата-энелерин ур-токмокко алган. Мындан улам эки тараптан 20-40 чакты тургун топтолушкан.

Окуя катталгандан кийин Баткен районунун акими Учкунбек Жоробаев, тиешелүү укук коргоо жана күч түзүмдөрүнүн жетекчилери Тажикстандын Исфара районунун төрагасы Баховадин Бахадурзода жетектеген тажик делегациясы менен жолугушуп, маселени жеринде карап, жыйынтыгында эки тарап өз аймактарында түшүндүрүү иштерин жана укук бузууга жол берген жарандарды мыйзам чегинде жоопкерчиликке тартуу боюнча иш жүргүзүүнү макулдашты.

Учурда чек аралаш аймактарда коомдук-саясий абал тынч. Укук коргоо жана күч түзүмдөрүнүн көзөмөлүндө", - деп билдиришти администрациядан.