Кыргыз-Тажик окуучуларынын жаңжалы: 4 кыргыз окуучусуна медициналык жардам көрсөтүлдү

Бүгүн, 23-сентябрда саат 13:00 чамасында Баткен районунун Көк-Таш айылынын Дахма жерлигинде мектептен келе жаткан төрт кыргыз окуучусун тажик айылынын 11-классынын 30га жакын окуучусу ур-токмокко алышканы, натыйжада 4 кыргыз окуучусу денелеринен түрдүү жаракат алып, ооруканага жеткирилгени маалымдалган.

Учурда окуучулардын абалы канааттандырарлык. Алар үйлөрүнө амбулатордук дарылануу үчүн жөнөтүлдү. Бул тууралуу Баткен райондук мамлекеттик администрациясынын басма сөз кызматчысы Гүлкайыр Эргешовага байланышканыбызда маалым болду.

"Окуучулар ур-токмокко кабылгандан кийин облустук ооруканага келип түшкөн. Анда аларга биринчи жардам көрсөтүлүп, балдардын ар бирин текшерүүдөн өткөрүштү. Абалы канааттандырарлык болгондон кийин амбулатордук дарылануу үчүн үйлөрүнө жөнөтүлдү. Абалдары жакшы.

Учурда чек аралаш аймактарда коомдук-саясий абал тынч", - деп билдирди Эргешова.