Алымкадыр Бейшеналиев вакцина алган соң каза болду деген аял тууралуу айтты

Саламаттыкты сактоо министри Алымкадыр Бейшеналиев Биринчи радиого берген маегинде буга чейин эмдөө алгандан кийин каза болуп калганы айтылып жаткан Назгүл Исакованын өлүмү вакцина менен байланыштуу болбогонун билдирди.

"Жалпыга маалымдоо каражаттарында талкууланып жаткан Назгүл Исакованын өлүмү боюнча жүргүзүлгөн акыркы соттук-экспертизанын жыйынтыгында, ал вакцина алганга чейин коронавирус менен ооруп жатканы белгилүү болду. Ошондой эле илдет өөрчүп пневмонияга өтүп кеткен. Назгүл Исакова вакцинадан эмес, коронавирустан улам каза болгон", - деди министр.

Ал ошондой эле азырынча Кыргыз өлкөсүндө вакцина алгандан кийин каза болуп калганы далилденген учурлар каттала электигин кошумчалады.

Эске салсак, буга чейин Назгүл Исакова аттуу 46 жаштагы жарандын Спутник V вакцинасын алгандан 2 күн өткөндөн кийин каза болуп калганы тууралуу маалыматтар тараган.