Баткенде тажик тарап кармап кеткен окуучулар бошотулду

Баткен облусунун Лейлек районуна караштуу Жаштык айылындагы тажик тарап кармап кеткен эки мектеп окуучусу бошотулду. Бул тууралуу президенттин Баткен облусундагы ыйгарым укуктуу өкүлүнүн басма сөз кызматынан билдиришти.

Маалыматка ылайык, президенттин Баткен облусундагы ыйгарым укуктуу өкүлү Абдикарим Алимбаев баштаган Баткен, Лейлек райондорунун акимдери жана облустук күч түзүмдөрүнүн жетекчилери Тажикстандын Согди облусунун аткаруу бийлигинин төрагасы Ражаббой Ахмадзода баштаган күч түзүмдөрүнүн жетекчилери менен жолугушкан.

"Жолугушууда кыргыз-тажик чек аралаш аймактарында орун алган окуялар боюнча талкуу жүрдү.

Сүйлөшүүнүн натыйжасында, Тажикстандын күч органдары тарабынан кармалган эки окуучу Лейлек районунун Жаштык айылынын тургундары бошотулду.

Мындан сырткары эки тарап орун алган окуяларды жөнгө салуу жана чек аралаш аймактарда коомдук-саясий абалды көзөмөлдөө, эки элдин ортосунда чыр-чатакка жол бербөө жана да социалдык баракчаларда чыгып жаткан чагымчыл маалыматтарды көзөмөлдөө боюнча макулдашты", - деп жазылат маалыматта.

Буга чейин Баткен облусунун Лейлек районуна караштуу Жаштык айылында эки мектеп окуучусун тажик тарап кечээ кармап кеткен.