50 миң сомго чейин. Ошто эл аралык мелдештерде алдыңкы орун алган спортчуларга акчалай сыйлыктар тапшырылды

Бүгүн, 24-сентябрь президенттин Ош облусундагы ыйгарым укуктуу өкүлү Зиядин Жамалдинов эл аралык мелдештерде ийгилик жараткан спортчуларды куттуктап, сыйлыктарды тапшырды. Бул тууралуу президенттин Ош облусундагы өкүлчүлүгүнөн билдиришти.

Маалыматка ылайык, Өзбекстан Республикасында өткөрүлгөн бильярд спортунун снукер түрү боюнча чемпиондукту багындырган Сыймык Ураимовго 50 миң сом, коло байге уткан Шаирбек Маматокторовго 20 миң сом акчалай сыйлык тапшырылды.

"Ошондой эле ХХ Эл аралык “Ысык-Көл оюндарында” Ош облусунун 60 жаштан жогору эркектердин волейбол командасынын биринчи орунду ээлеген спортчуларына 15 миң сом акчалай сыйлык тапшырылды. Ал эми алыш бел күрөш боюнча чемпион болгон Роман Сапаров (60 килограмм), Мыктыбек Каныбек уулуна (90 килограмм) 5 миң сомдон акчалай сыйлык берилди.

Мындан тышкары Орусия Федерациясынын куралдуу күчтөрү менен биргеликте өткөрүлгөн эл аралык “АрМИ-2021” танкалык биатлон жана десанттык взвод мелдештеринде катышып, 1-орунду ээлеген Ош гарнизонунун аскер кызматкерлеринин ар бирине 10 миң сомдон акчалай сыйлык жана Ардак грамоталар тапшырылды", - деп билдиришти өкүлчүлүктөн.