Сирияда соттолгон кыргыздардын балдарын мекенине кайтаруу маселеси талкууланды

Сирияда соттолгон Кыргыз жарандарынын балдарын мекенине кайтаруу маселеси каралды. Тышкы иштер министрлигинин маалымат кызматынан кабарлашкандай, Нью-Йорктогу Бириккен улуттар уюмунун 76-сессиясында тышкы иштер министри Руслан Казакбаев Сирия Араб Республикасынын тышкы иштер министри Фейсал Мекдад менен жолугушту.

Тышкы иштер министри Руслан Казакбаев кыргыз тарап Сириядагы кырдаалдын өнүгүшүнө кылдат көз салып турат жана көптөгөн курмандыктарга, гуманитардык кырсыкка жана саясий кризистин андан ары күчөшүнө тынчсыздануусун белгиледи. Ушуга байланыштуу Кыргыз мамлекети Сириядагы бардык тараптарды БУУнун ортомчулугу менен өлкөнүн бардык саясий күчтөрүнүн диалогу аркылуу ок атууну токтотууга жана кризисти тынчтык жолу менен жөнгө салууга чакырат.

Ошондой эле Руслан Казакбаев Кыргыз Республикасы өлкөдөгү туруктуулукту калыбына келтирүүнү, Сириянын суверенитетин жана аймактык бүтүндүгүн сактоону жактай турганын белгилеп, дүйнөлүк коомчулуктун биргелешкен аракети сириялык кризисин тынчтык жолу менен жөнгө салууга жардам берерине ишенимин билдирди.

Тараптар Сирияда соттолгон Кыргыз жарандарынын балдарын мекенине кайтаруу маселесин да талкуулашты. Сириянын тышкы иштер министри бул маселеде керектүү жардам көрсөтүүгө даяр экенин билдирди.