Ош шаарынын мэриясы «Чайна Роад» компаниясы менен эки тараптуу кызматташуу боюнча меморандумга кол койду

Бүгүн, 27-сентябрда Ош шаарына Кытай Эл Республикасынын "Чайна Роад" компаниясы Кыргыз өлкөсүндөгү өкүлчүлүгү эки тараптуу кызматташууда пландалган долбоорлорду жеринен көрүү максатында келишти. Бул тууралуу шаардык мэриянын басма сөз кызматынан билдиришти.

Кытай корпорациясынын Кыргыз жолдорду жана көпүрөлөрдү куруу өкүлчүлүгүнүн башкы директору Хоу Хусян баштаган жумушчу топту Ош шаарынын биринчи вице-мэри Марс Исаев кабыл алды. Андан соң компаниянын өкүлдөрү Ош шаарынын мэри Алмаз Мамбетов менен биргеликте жолдорду, көпүрөлөрдү, тыгын учурдагы абалдарды, таштанды талаасын жана башка жерлерди жеринен көрүп келишти.

Таанышуунун соңунда Ош шаарынын мэри Алмаз Мамбетов жана «Чайна Роад» компаниясынын өкүлү Хоу Хусян менен эки тараптуу кызматташуу боюнча жолдорду оңдоп-түзөөдөн өткөрүү жана куруу, таштандыларды кайра иштетүүчү заводдорду куруу боюнча меморандумга кол коюшту.