"21 жылдан бери эч кандай көңүл бурулган жок". Баткен окуясынын катышуучулары митингге чыгышты

Бүгүн, 30-сентябрда Бишкектеги өкмөт үйүнүн алдында Баткен окуясынын ардагерлеринин катышуусунда тынчтык митинги болуп өттү.

Анда Баткен окуясынын ардагерлеринин льготалык статусун мыйзамдын негизинде кайтарып берүү жана социалдык жеңилдиктерди карап берүүнү суранышты.

"Биз бүгүн Баткен согушунун ардагерлери жети дубандан чогулуп, өкмөт башчыга өзүбүздүн кайрылуубузду айтып келдик. Баткен согушунан курман болгондордун үй-бүлөлөрүнө жана ден соолугунун мүмкүнчүлүгү чектелгендерге акча каражаттарды бөлүп берүүсүн суранабыз. 21 жылдан бери эч кандай көңүл бурулган жок", - дейт Балыкчы шаарынын Баткен согушунун ардагерлер кеңешинин төрагасы Кубат Исаев.

Ошондой эле ардагерлер президенттин аппарат жетекчилиги тараптан жооп болгондугун, 20-октябрга чейин бул маселелерди чечип берерин билдиргенин айтышты.