Электр жарыгы өчкөндө кычкылтек аппаратына туташтырылган бейтап каза болду. Тиешелүү мекеменин жообу

Кычкылтек аппаратына туташтырылган бейтап генератор иштебей калганда тумчугуп каза болду. Бул тууралуу Асел аттуу жаран Tвиттер баракчасына жазып чыкты.

"Апама кесиптеши каза болгонун айтышты. Ал (маркум) кычкылтек аппаратына туташтырылган экен. Электр жарыгы өчкөндө генератор иштебей, ал тумчугуп калган.

Электр жарыгын өчүрүү - бул кечки ондон кийин уктоого даярдануу эмес...", - деп жазган ал.

Бул боюнча "Улуттук энергетикалык холдинг" ишканасынын маалымат кызматына байланышканыбызда, төмөнкүлөрдү билдиришти.

"Медициналык мекемелердин жандандыруу, хирургия бөлүмү сындуу биринчи категорияга кирген объектилерге электр жарыгы үзгүлтүксүз берилет. Аларды электр энергиясы менен туруктуу камсыз кылуу өзгөчө көзөмөлгө алынган", - дешти маалымат кызматынан.

Энергетика жана өнөр министрлигинин маалыматы боюнча, медициналык мекемелердин трансформаторуна чейин электр энергиясын жеткирүү Энергетика министрлигинин милдети. Ал эми ал жайлардагы трансформатордун иштеши жана кошумча генератор менен камсыз кылуу мекеменин администрациясынын жоопкерчилигинде.