"Коркууну билишпейт". "Талибан" кыймылы Ооганстандын чек арасына жан кечтилер батальонун жайгаштырды

"Талибан" кыймылынын өкүлдөрү Ооганстандын чек арасына атайын "жан кечти батальонун" жайгаштырууда. Бул тууралуу Бадахшан провинциясынын губернаторунун орун басары Нисар Ахмад Ахмадиге таянуу менен чет элдик басылмалар жазышты.

Маалыматка ылайык, чек арага жайгаштырылган жан кечтилер батальону "Мансурдун армиясы" деп аталат. Батальон Тажикстан, Пакистан жана Кытай менен чектеш Бадахшан провинциясынын чек арасына жайгаштырылган. Насар Ахмади батальон ооган өкмөтүнүн мурунку коопсуздук күчтөрүн бутага алган коркунучтуу чабуулдарды баштай турганын билдирген.

"Бул батальон болбогондо, АКШнын базасын талкалоо мүмкүн эмес болчу. Бул адамдар коркууну билишпейт, алар жардыргыч заттар менен жилет кийип, АКШнын Ооганстандагы базаларына чабуул коюшкан", - деген Ахмади.

Буга чейин Тажикстандын президенти Эмомали Рахмон Ооганстандын чек арасына жакын жашаган тажикстандыктарды сак болууга чакырган.