Папан айыл аймагынын тургундары УКМКга нааразычылыгын билдирди. Мекеменин жообу

Ош облусунун Кара-Суу районуна караштуу Папан айыл аймагынын тургундарынын УКМК иштебейт деген нааразычылктарын билдиришкен. Аталган мекеме келип түшкөн арыз-дооматтарын карап чыгып, соттук чечимдерге тиешеси жоктугун кабарлашат.

Ош облусуна караштуу Кара-Суу районунун Дыйкан-Кыштак айылынын тургундарынын арыз дооматтарынын негизинде жарандык сот инстанцияларынын отурумдары болуп өткөндүгү аныкталды.

"Дыйкан-Кыштак айылынын тургундары үлүш жерлерине Папан айыл аймагынын тургундары мыйзамсыз үйлөрдү куруп алганын белгилеп, мыйзам чегинде курулуш иштерин токтотуп, курулуп калган үйлөрдү сүрдүрүп берүүнү өтүнүшкөн.

Жогорку Соттун 28-июнундагы чечимине ылайык мыйзамсыз курулуш деп табылып, сүрдүрүү иштери Кара-Суу районунун сот аткаруучулар кызматына жүктөлгөн.

Муну менен катар буга чейин мыйзамсыз курулуш иштерин жүргүзүп жаткан Папан айыл аймагынын тургундарына үлүш жер ээлери жана жергиликтүү бийлик өкүлдөрү тарабынан бир нече ирет курулуш иштерин токтотуу боюнча эскертилген.

28-сентябрь күнү сот аткаруучулар баштаган комиссия тарабынан аталган жерде курулуп бүткөн мыйзамсыз 14 үйдүн экөө сүрдүрүлгөн. Бул чечим жарандык тартипте каралган соттук чечим болуп саналат жана бул чечимге Улуттук коопсуздук комитети жана жетекчилигинин эч кандай тиешеси жок", - дешет мекемеден.