Венгриянын Эмгек сиңирген артисти Марта Месарош тышкы иштер министрине өтүнүч менен кайрылды

Венгриянын Эмгек сиңирген артисти Марта Месарош тышкы иштер министри Руслан Казакбаевге өтүнүч менен кайрылды. Бул туурасында тышкы саясий ведомствонун маалымат кызматы тарабынан белгилүү болду.

Мекемеден кабарлашкандай, министр Будапештте белгилүү скульптор Ласло Месароштун (венгер скульптору) кызы Марта Месарош жана анын уулдары менен жолугушту.

"Жолугушуу учурунда Марта Месарош Кыргыз жергесине кайра келүү каалоосу жөнүндө айтып, атасынын жашоосун күбөлөндүрүүчү документтерди табууга жардам берүү өтүнүчү менен Руслан Казакбаевге кайрылды. Ал ошондой эле венгрлер менен кыргыздардын жаш муундары үчүн атасынын элесин сактоого жардам сурады.

Министр компетенттүү органдарга анын атасынын кармалышынын себептери тууралуу архивдик маалыматтарды издөө өтүнүчүн берерин, президент Садыр Жапаровго кайрыларын айтты", - дешет мекемеден.

Ласло Месарош 1935-жылы Кыргыз өлкөсүнө "Интергельпо" кооперативи менен эмиграция кылган. Ал азыркы борбордун имиджин калыптандырууга чоң салым кошкон. Советтик индустриянын тез өнүгүү мезгилинде ал жаңы имараттарды долбоорлоо жана куруу менен алектенген, анын белгилүү долбоорлорунун арасында өкмөт үйүнүн имараты, темир жол бекети жана Кыргыз Республикасынын Улуттук банкы бар.

Скульптордун кызы Марта Месарош Венгриянын Эмгек сиңирген артисти, режиссёр жана искусство жаатында көптөгөн эл аралык сыйлыктардын лауреаты. Анын атактуу чыгармаларынын бири - СССРдеги репрессиялар тууралуу темир көшөгөнүн артында тартылган биринчи фильм "Менин балдарымдын күндөлүктөрү" тасмасы.