Ленин акимчилигинде "Ош базарындагы" башаламан соода-сатык маселеси талкууланды

Ленин акимчилигинде "Ош базары" соода комплексинин айланасындагы стихиялуу соода-сатыкты жоюу маселеси талкууланды. Бул тууралуу шаардык мэриянын маалымат кызматынан маалымдашты.

Ага ылайык, жыйынга Бишкек шаарынын биринчи вице-мэри Максатбек Сазыкулов жана Ленин районунун акими Русланбек Тагаев катышты.

"Жолугушууга "Ош базары" соода-оюн-зоок комплексинин аймагындагы ишкердик субъекттер: "Беш-Сары" соода борбору, "Берекет Универсал" соода борбору, "Берекет Гранд" соода борбору, "Кыял" мамлекеттик ишканасы, Элдик чеберлер союзу жана башка субъекттер, ошондой эле шаардык жана райондук кызматтар катышты.

Катышуучулар базардагы стихиялуу сооданы жоюу боюнча биргелешкен планды иштеп чыгуу, базардын ичинде стихиялуу соодагерлерди жайгаштыруу маселелерин талкуулашты. Соода эрежелерин бузгандыгы үчүн административдик жоопкерчиликти кароо сунушталды", - деп айтылат маалыматта.