Талант Мамытов жогорку окуу жайлардын жана орто мектептердин мугалимдери менен жолугушту

Бүгүн, 6-октябрда Жогорку Кеңештин төрагасы Талант Мамытов жогорку окуу жайлардын жана орто мектептердин мугалимдери менен жолугушту. Бул тууралуу парламенттин басма сөз кызматынан билдиришти.

Алгач төрага агартуучуларды кесиптик майрамы - билим берүү кызматкерлердин күнү менен куттуктап, алардын билим берүү тармагына кошкон салымы жогору экенин белгиледи.

Ошондой эле Талант Мамытов жаш муундарды окутуп, тарбиялоодогу жигердүү ишмердүүлүгү үчүн мугалимдерге ыраазычылык билдирди. "Келечек муундун өкүлдөрүн ажайып илим дүйнөсүнө жетелеп, алардын жеткиликтүү билим, татыктуу тарбия алуусуна камкордук көрүү мугалимдердин асыл милдети. Анткени "Мыкты билим – улуу күч" дегендей, билимдүү жаштар элибиздин эң башкы байлыгы. Кыргыз мамлекетинин бакубат келечеги да жаштарга таандык. Андыктан биздин өлкөдө билим берүүгө өзгөчө көңүл бурулууда. Азыркы ааламдашуу доорунда адамзат болочогун илим менен билимсиз элестетүү эч мүмкүн эмес", - деди.

Иш-чара алкагында алдыңкы агартуучуларга Жогорку Кеңештин Ардак грамоталары жана ыраазычылык каттары тапшырылды.