"Көмүрдүн баасын негизсиз көтөргөндөргө чара көрүлөт" дейт Бишкектин мэри

Көмүрдүн баасын себепсиз көтөргөндөргө чара көрүлөт. Бул тууралуу шаар мэри Айбек Жунушалиев маалымат жыйында билдирди.

Жунушалиевдин айтымында, Бишкек шаарында көмүр сатып алуу үчүн 6 отун базасы жана 7 стационардык пункт иштеп жатат.

"Азыркы учурда аба ырайы кескин сууктап, көмүрдүн баасы жогорулап 4 миң 800 сомго чейин чыгыптыр. Буга чейин 4 миң 500 сомго чейин болгон. Бүгүн Монополияга каршы жөнгө салуу агенттиги менен мэриянын кызматкерлери бирге рейд жүргүзүү боюнча тапшырма берилди. Эгер негизсиз көмүрдүн бааларын көтөргөндөр болсо, аларга карата чара көрүлөт. Калаада көмүр бар. Ошондуктан шаар тургундарын өз убагында көмүр сатып алууга чакырабыз", - деди Жунушалиев.

Буга чейин Бишкек шаарында көмүр сатып алуу үчүн пункттардын дареги жазылган.