"Мени издегендер конуштарга келиңиздер". Айбек Жунушалиев блогерлер менен иштешүүгө даяр экендигин билдирди

Бүгүн, 7-октябрда Бишкек шаарынын кышка даярдык көрүү боюнча маалымат жыйыны өттү. Ага шаар мэри Айбек Жунушалиев жана вице-мэрлер катышты.

Маалымат жыйында Жунушалиев блогерлер менен иштешүүгө даяр экендигин айтты.

"Көпчүлүгү "сизди көрбөй жатабыз" деп жазышат. Блогерлерге, социалдык тармактын активдүү колдонуучуларына айтар элем. Эгер мени издесеңиздер жаңы конуштарга келиңиздер. Анткени ал жактардан мени көрүү мүмкүнчүлүгү чоң. Биз күн сайын жаңы конуштарга барабыз.

Башынан бери эле айтып келем. Биз кызматка өзүбүздү жарнамалоо үчүн келген эмеспиз. Мен кайсы бир конушка барып алып түз эфирге чыгып отурбайм.

Бизде маалымат кызматы бар. Алар мэриянын иши тууралуу кабар берип турушат. Маалымат жыйындарда суроолорго жооп берип турабыз", - деп билдирди Жунушалиев.