Он беш жылдык тарыхы бар "Бүтүн Кыргызстан" саясий партиясынын шайлоого карата талапкерлерин тааныштыруу съезди өттү

Бүгүн, 9-октябрда "Бүтүн Кыргызстан" саясий партиясынын шайлоого карата талапкерлерин тааныштыруу съезди болуп өттү.

Съездге делегаттар, "Бүтүн Кыргызстан" саясий партиясынын талапкерлери жана коноктору катышышты.
Алгач съезд аталган партиянын гимни менен башталып, партиянын төрагасы Адахан Мадумаровдун сөз сүйлөөсү орун алды.

Ал быйыл 2021-жылкы шайлоого катыша турган "Бүтүн Кыргызстан" саясий партиясынын мурунку курамын дээрлик сактап калууга аракет кылышканын белгилеп, партиянын максатын жана программаларын айтып өттү.

"Биз президенттик шайлоого чыкканда артка кайталы деген программа менен чыкканбыз. Артка чакыруунун негизги идеясы Советтер Союзунун билим берүү жана саламаттыкты сактоо системаларын кайрадан калыбына келтирүү. Себеби дүйнө жүзү боюнча эң алдыңкы система Советтер Союзундагы коммунистик партиянын ойлоп тапкан билим берүү жана саламаттыкты сактоо системалары болуп келген. Бул боюнча буга чейин Англиянын билим берүү министрлиги, орто окуу жай системасын советтик системага кайтарып бүткөндүгүн расмий түрдө жарыялады. Биз болсо даяр турган нерсени талкалап бүттүк.

Мындан тышкары, тоо-кен тармагы боюнча биз тең шериктик системасына өтүшүбүз керек. Кайсы өлкө, кайсы фирма өндүрөм дей турган болсо, ошолор менен тең шериктик түзүүбүз зарыл.

Тышкы саясат боюнча элчилердин санын кескин кыскартабыз. Айрым өлкөлөрдөгү элчилердин бизге кереги жок. Сандарын эмес, сапатын жогорулатышыбыз керек", - деди Адахан Мадумаров.

Ошондой эле экология, маданият жана спорт тармагындагы көйгөйлөрдү, аны менен катар чечүү жолдорун, демилгелерин айтып өттү.

Ага улай "Бүтүн Кыргызстан" саясий партиясынын саясий кеңешинин мүчөсү Мирбек Мунарбек уулу:

"Биздин эң алгачкы жасай турган иштер - конституция, конституциялык жана шайлоого байланыштуу мыйзамдар, кодекстер. Партиябыздын программалары 15 жылдан бери өзгөрбөйт. Айрым нерселер гана алынып, кошумчаланат. Быйылкы шайлоонун таза өтүүсүнө ниет кылабыз", - деп сөз сүйлөдү.

Андан соң партия мүчөлөрүнүн жарыш сөздөрү сүйлөнүп, делегаттардын айрым суроолоруна төрага Адахан Мадумаров жооп берди.

Мындан тышкары, 2021-жылдын 28-ноябрына белгиленген Жогорку Кеңештин депутаттыгына талапкерлердин тизмесин бекитүү боюнча делегаттардын жашыруун добуш берүүсү орун алып, мүчөлөр тааныштырылды.

2006-жылы түзүлгөн бул партиянын ушул күнгө чейинки жасаган иштери, кылган эмгектери чагылдырылган кыскача тасма көрсөтүлүп, бата менен жыйынтыкталды.

Белгилей кетсек, аталган партия 54 кишиден турат жана съездге жалпысынан 102 делегат катышты.