Күрөш боюнча курама команда Дүйнө чемпиондугунан кайтып келди

Күрөш боюнча Кыргыз өлкөсүнүн курама командасы Дүйнө чемпиондугунан кайтып келди. Бул тууралуу Жаштар иштери, дене тарбия жана спорт боюнча мамлекеттик агенттиктин басма сөз кызматынан билдиришти.

Маалыматка ылайык, бүгүн, 12-октябрда "Манас" эл аралык аэропортунда спорттун күрөш түрү боюнча Дүйнө чемпиондугуна катышкан өлкөнүн эркин күрөш жана грек-рим күрөшү боюнча курама команданы тосуп алышты.

Эске салсак, күрөш боюнча Дүйнө чемпиондугу 2-10-октябрь күндөрү Осло шаарында (Норвегия) өттү.

Маалымат үчүн:

Дүйнө чемпиондугунун финалдык беттешинде Айсулуу Тыныбекова америкалык Кайла Коллина Кийок Чудо аттуу балбан кыз менен кез келип, 7:0 эсебинде жеңип, экинчи ирет катары менен Дүйнө чемпиону аталды.

8-октябрга караган түнү Дүйнө чемпиондугунун финалында кыргыз балбан кызы Мээрим Жуманазарова япониялык Рин Мияджи аттуу балбанды жеңип, Дүйнө чемпиону аталган.

Айпери Медет кызы коло медаль үчүн болгон беттеште украиналык Анастасия Шустова аттуу балбан менен кез келип, 12:1 эсебинде жеңип, коло медаль тагынган.

Жоламан Шаршенбеков, Эрназар Акматалиев Дүйнө чемпиондугунда күмүш байгени багындырышты. Ошондой эле Алибек Осмонов 65 килограмм салмакта коло байгеге ээ болгон.