"Жолдошум кырсыктан улам бир колунан ажырап калган. 5 миң сомго жетпеген пенсия менен жашоо кыйын болууда" дейт Кара-Балтанын тургуну

SUPER.KG порталына Элзира Абдыгапарова аттуу жаран кайрылды. Анда ал мамлекет тарабынан ден соолугунун мүмкүнчүлүгү чектелген жарандарга жетиштүү деңгээлде көңүл бурулса деген оюн билдирди.

"Биз Кара-Балта шаарында турабыз. Жолдошумдун аты-жөнү Шавкат Раимбеков. Ден соолугунун мүмкүнчүлүгү чектелген жаран. Шаардагы кагаз цехтеринин биринде болгон кырсыктан улам оң колунан ажырап калган. 5 миң сомго жетпеген пенсия алат. Бүгүнкү күндө бул суммага жашоо кыйын. Өзүңүздөр билесиздер, баары кымбаттап жаткан учурда мындай пенсия менен күн кечирүү кыйла кыйын.

Учурда кош бойлуумун. Бир кызыбыз бар. Ден соолугума байланыштуу үйдө болуп, иштегенге мүмкүнчүлүк жок болууда. Буга чейин базарда иштеп күн кечирип келгем. Эми болсо үйдө отуруп калдым. Мурун жолдошум базарда мага жардам берип турчу. Азыр болсо жалгыз иштей албайт. Батирде турабыз.

Президент Садыр Жапаровго дагы кайрылып кетер элем. Ден соолугунун мүмкүнчүлүгү чектелген жарандарга жакшы деңгээлде көңүл буруп, иштегенге шарт түзүп берсеңиз жакшы болмок", - деп билдирди окурман.