Боом капчыгайында 18-октябрдан баштап таштарды кулатуу иштери жүргүзүлөт

18-октябрдан 22-октябрга чейин Бишкек-Нарын-Торугарт жолунун 131-чакырымында (Боом капчыгайы, темир жолдун 3901-чакырымы) коркунучтуу таштарды түшүрүү жумуштары жүргүзүлөт. Бул туурасында "Кыргыз темир жолу" мамлекеттик ишканасы маалымдайт.

Мекемеден белгилешкендей, иш-чарага тиешелүү күчтөр жана техникалар тартылып, жол кыймылынын коопсуздугун камсыздоо боюнча башкармалыктын кызматкерлери тарабынан жолду жарым-жартылай тоскондон кийин күндүз саат 09:00дөн 15:00гө чейин жүргүзүлөт.

Жолду тазалоо учурунда транспорт каражаттары бир тилке боюнча каттайт. 30-40тан ашык унаанын топтолушу менен таштарды түшүрүү иштери токтоп, унааларды өткөрүүгө уруксат берилет. Иш-чаралар аталган тилкеде таш кулоо коркунучун алдын алуу максатында жүргүзүлүүдө.