Айгүл Жапарова Салтанат Саматова атындагы сыйлык тапшыруу аземине катышты

18-октябрь күнү шаардагы мейманканалардын биринде Салтанат Саматова атындагы "Колумду карма" сыйлыгын тапшыруу аземи болуп өттү. Ага өлкөнүн биринчи айым Айгүл Жапарова дагы катышты. Бул тууралуу видео жергиликтүү басылмаларда жарыяланды.

Ал өз сөзүндө иш-чаранын уюштуруучуларына жана катышуучуларына ыраазычылыгын билдирип, аны менен катар бала жоготуу азабы кандай экенин айтып өттү.

"Бала жоготуу менин да башымда бар. Бул эч качан унутулбайт. Бирок Салтанаттын артында кандай иштер калды? Салтанат бизди эмнеге үйрөттү? Салтанат бизди оору менен күрөшүүдө эч качан жеңилбөөнү жана ооруну жашырбаска үйрөттү. Бул Салтанаттын эң күчтүүлүгү жана мыктылыгы.
Мен башыман өткөн апа катары, анын апасын абдан түшүнөм. Бул эч качан унутулбайт", - деди Айгүл Жапарова.

Белгилей кетсек, сыйлык "Оңой жардам берүү" коомдук фонду тарабынан негизделген жана өлкөдө биринчи жолу берилип жатат. Сыйлык эмгеги, чыгармачылыгы жана кайрымдуулуктун өнүгүшүнө кошкон салымы менен кыргыз элинин жүрөгүнө из калтырган Салтанат Саматованын сиңирген эмгегин эскерүүгө негизделген. Ошондой эле залалдуу шишик дартына каршы күрөшүүгө, маданиятты жана кайрымдуулукту өнүктүрүүгө салым кошкондорго арналат.