Руслан Казакбаев Азербайжандын Кыргыз өлкөсүндөгү элчисин кабыл алып, ыраазычылык билдирди

Бүгүн, 19-октябрда Руслан Казакбаев Азербайжандын Кыргыз өлкөсүндөгү атайын жана ыйгарым укуктуу элчиси, дипломатиялык корпустун башчысы Гидаят Оруджевди дипломатиялык миссиясы аяктагандыгына байланыштуу кабыл алды. Бул тууралуу Тышкы иштер, тышкы соода жана инвестициялар министрлигинен билдиришти.

Маалыматка ылайык, тараптар кыргыз-азербайжан мамилелери жогорку деңгээлде экендигин айтышты. Ошондой эле Азербайжандын Кыргыз өлкөсүндөгү элчисинин ишмердүүлүгүнүн жыйынтыктарын чыгарышты.

"Министр Руслан Казакбаев элчи Оруджевдин Кыргыз өлкөсү менен Азербайжандын ортосундагы саясий диалогду, соода-экономикалык жана маданий-гуманитардык мамилелерди чыңдоого кошкон өзгөчө салымын белгиледи.

Ошол эле учурда элчи Оруджев Кыргыз өлкөсүндө дипломатиялык ишмердүүлүгүнүн мезгилинде кыргыз тарап менен дайыма колдоо, түшүнүшүү жана конструктивдүү кызматташуу болгонун белгиледи.

Жакынкы жана ортоңку мезгилге карата эки тараптуу күн тартибиндеги милдеттер өзүнчө каралды", - деп айтылат министрликтин маалыматында.