Май айынан бери чет өлкөдөн 95 Кыргыз жаранынын сөөгү өлкөгө алып келинди

Бүгүн, 20-октябрь күнү Тышкы иштер министрлигинин ишмердүүлүгү тууралуу маалымат жыйын өтүүдө.

Анда тышкы иштер министринин орун басары Айбек Артыкбаев чет өлкөдө каза тапкан Кыргыз жарандарынын сөөгүн өлкөгө алып келүүгө кеткен бардык чыгымдар мамлекеттин эсебинен жабыларын билдирди.

Тактап айтканда, өкмөттүн апрель айындагы токтомуна ылайык каражаттардын суммасы сөөктү алып келген өлкөнүн географиялык жайгашышына карата бекитилген.

Мында репатриациялоого каражатты каза болгон жарандын жакын туугандарына берүү элчиликтер тарабынан же атайын маалыматтык-консультациялык борборлор тарабынан ыкчам жүзөгө ашырылууга тийиш.

Жаңы токтомго ылайык, ушул жылдын 15-майынан бери өлкөгө Орусия, Казакстан, Түркия, Италия сыяктуу өлкөлөрдө каза болгон кыргыздардын сөөгүн алып келүүдө 95 учур боюнча каражат төлөнүп берилген.