"Шагыл төгүп берип жатат". Нарында депутаттыкка талапкер атаандашынын үстүнөн БШКга арыз жазды

Жогорку Кеңешке шайлоого №33 Нарын округунан чыгып жаткан талапкер Чыңгыз Капаров Борбордук шайлоо комиссиясына ушул округдан талапкер Улан Бакасовдун үстүнөн арызданды. Бул тууралуу БШКнын Ыкчам чара көрүү тобунан билдиришти.

Маалыматка ылайык, Капаровдун айтымында талапкер Бакасов “үгүт иштерин эрте баштап, Эмгек-Талаа, Хутор, Ак-Кудук, 8-март, Шоро айылдарынын аймактарына шагыл төгүп жатканын айткан.

Ал эми Улан Бакасовдун расмий өкүлү Майрамбек Өмүрбаев Фейсбук баракчасына билдирүү жазды.

"Шайлоо өнөктүгү башталганга чейин эле өз көлөкөңүздөн өзүңүз коркуп, өзүңүздүн жердешиңиз Улан Бакасовду каралоодон баштаганыңызга жол болсун. Даттанууда айтылган Нарын районунун Нарын-8-март унаа жолун оңдоп-түзөө иштерин Улан Бакасов эмес, №8 жол тейлөө мекемеси жасап жатат. Арызданганга чейин алгач барып айыл элинен бир маалымат сурап, аныгын тактап, андан соң жалаа жапсаңыз жигиттик болмок", - деп жазылат билдирүүдө.

БШК иликтөө жана укуктук баа берүү үчүн Ички иштер министрлигине маалымат жөнөтүлгөнүн кабарлады.