ЭЛДИК КАБАРга жооп: "Лейлектин Арка 2 айылына кошумча дарыгерлер жөнөтүлөт" дешти тийиштүү мекемеден

SUPER.KG порталынын "ЭЛДИК КАБАР" бөлүмүнө Баткен облусунун Лейлек районунун Арка 2 айылынын тургуну кайрылып, анда ал аталган айылда сасык тумоо менен ооругандардын саны көп экендигин, бирок дарыгер ордунда жок болуп жатканын айткан.

Бул боюнча Лейлек районундагы жалпы дарыгердик практикалык борборунун жетекчисинин орун басары Эркин Турдубаев төмөнкүлөрдү билдирди.

"Арка 2 айылында эки дарыгер бар. Бирөөсү Жылдыз Баатырованы Ошко окууга жөнөткөнбүз. Дагы бири Жылдыз Раатбекова жарым ставка менен түшкө чейин эле иштейт. Эртең райондон кошумча дарыгер жөнөтөм. Негизи дарыгерлер аз.

Эртең өзүм дагы Арка 2 айылына барам. Дарыгер керек болгондо Достук айылындагы оорукананын дарыгери Насыр Хасанов бейтаптарды кабыл алып жатат.

Мындай кырдаал убактылуу эле жаралды", - деп билдирди Эркин Турдубаев.