"Үгүт ишин эрте баштады". Бир мандаттуу округдан депутаттыкка талапкер Болотбек Бегалиевдин үстүнөн даттануу түштү

Бир мандаттуу округдан Жогорку Кеңештин депутаттыгына талапкерлигин көрсөткөн Болотбек Бегалиевдин дарегине карата үгүт иштерин эрте баштады деген даттануулар болууда.

Билдирүүсүндө талапкер өзү тууралуу депутат болуу ниети жөнүндө айтат. Болотбек Бегалиевдин билдирүүсүн бир катар интернет колдонуучулар бөлүшүп, Борбордук шайлоо комиссиясына кайрылгандар да болду.

БШКнын маалымат кызматынан талапкердин дарегине карата үгүт иштерин эрте баштаган деген арыз келип түшкөнүн, учурда териштирүү иштери жүргүзүлүп жатканын тастыкташты.

"Бүгүн жумушчу топ жогорудагы арызды карап чыктык. БШКнын отурумунда сунушубузду айтып, чечим чыгарабыз", - деп белгилешти мекемеден.

Белгилей кетсек, парламенттик шайлоо 28-ноябрга белгиленген, ал эми үгүт иштери 29-октябрда башталат.