Күзөтчүнү сабап, сатуучуну коркутушкан. Орусияда каракчылыкка шектелип 3 кыргыз жигити кармалды

Орусияда 3 Кыргыз жараны каракчылыкка шектелип кармалды. Орус басылмаларынын маалыматына караганда, алар азык-түлүк дүкөнүнө тоноого киришкен.

Басылмаларда жазылган маалыматта, окуя 25-октябрга караган түнү Санкт-Петербургдун Красносельск районунда орун алганы жазылат.

"Дүкөнгө белгисиз адамдар кирип, 30 жаштагы күзөтчүнү сабап, андан соң 26 жаштагы сатуучу кызды бычак менен коркутушкан. Карактагандар 5 миң рубль акча жана 10 миң рублга азык-түлүк алып кетишкен.

Окуянын күбөлөрү полиция кызматына кабар беришкен. Ыкчам издөө иштеринин жүрүшүндө 3 сааттын ичинде шектүүлөр кармалышкан. Алар ошол эле дүкөн жайгашкан көп кабаттуу үйдөгү батирлердин биринде болушкан. Кармалгандар 20 жаштан 22 жашка чейинкилер, тергөө иштери жүргүзүлүүдө", - деп айтылат маалыматтарда.