2 миң сомго чейин. 1-октябрдан баштап өлкөдө социалдык жөлөк пулдар көбөйтүлдү

Өлкөдө ай сайын берилүүчү жөлөк пулдардын өлчөмү 1-октябрдан баштап 50 пайызга жогорулады. Бул тууралуу Социалдык өнүктүрүү министрлигинен билдиришти.

"1-октябрдан баштап жөлөк пулдар көбөйтүлдү. Бирок төлөө ноябрдан баштап болот. Мисалы, мурда 4000 сом алса, октябрда кошулган 2000 сом төлөм менен ноябрдыкын кошуп 8000 сом алышат. Ал эми декабрда 6000 сомдон алып баштайт", - дешти министрликтен.

Ар айлык социалдык жөлөк пулдардын көбөйтүлгөн суммалары:

* 18 жашка чейинки ден соолугунун мүмкүнчүлүктөрү чектелүү балдарга 4000 сомдон 6000 сомго чейин;

* ВИЧке же СПИДге чалдыккан энелерден төрөлгөн балдарга, алар 18 айга толгонго чейин 4000 сомдон 6000 сомго чейин;

* бала кезинен I топтогу ден соолугунун мүмкүнчүлүктөрү чектелүү адамдарга 4000 сомдон 6000 сомго чейин;

* бала кезинен II топтогу ден соолугунун мүмкүнчүлүктөрү чектелүү адамдарга 3300 сомдон 4950 сомго чейин;

* бала кезинен III топтогу ден соолугунун мүмкүнчүлүктөрү чектелүү адамдарга 2700 сомдон 4050 сомго чейин;

* атасынан же энесинен айрылган балдарга 1000 сомдон 1500 сомго чейин;

* атасы менен энесинен экөөнөн тең айрылган балдарга 2000 сомдон 3000 сомго чейин;

* атасы менен энеси белгисиз балдарга 2000 сомдон 3000 сомго чейин.

Эске салсак, буга чейин президент Садыр Жапаров "Жарандардын айрым категорияларына социалдык жөлөк пулдун өлчөмүн жогорулатуу жөнүндө" жарлыкка кол койгон.

Айта кетсек, чыгымдар республикалык бюджеттен каржыланат.