"Президенттин чек ара боюнча айткан сөздөрүн айрымдар бурмалоодо" дейт өлкө башчынын маалымат катчысы

Президент Садыр Жапаровдун Кыргыз-Тажик чек арасы боюнча айткандарын айрым кызыкдар тарап бурмалоодо. Бул туурасында президенттин маалымат катчысы Эрбол Султанбеков билдирди.

"Алар эки тарапты кайраштырууга аракет кылып, социалдык тармакка ар кандай жалган, текстти өз сөзү менен окуган видеоматериалдарды жарыялоодо.

Албетте, чек ара маселеси бир эле тараптын кызыкчылыгында чечилбейт. Сөзсүз түрдө эки тараптын тең кызыкчылыктары эске алынышы керек. Ошондо гана биз бул көйгөйдү тынчтык жолу менен чече алабыз. Кыргыз тарап, биз бир пикирге келип жана бардыгын тынчтык жолу менен чечебиз деп ишенет", - деген билдирүүсүндө.

Белгилей кетсек, 23-октябрда президент Садыр Жапаров маалымат жыйын өткөрүп, чек ара маселеси боюнча берилген суроого жооп берип, чек арадагы көйгөйлөрдү дароо чечүү мүмкүн болбой жатканын, буга мурда кетирилген бир катар катачылыктар тоскоолдуктарды жаратып жатканын айткан.