Жер тилкеси "Ата-Түрк" сейил багынан бөлүнгөн. Бишкекте 43 миллион сомго аялдардын күрөш залы курулат

Бишкекте аялдар үчүн күрөш залы курулат. Маданият, маалымат, спорт жана жаштар саясаты министрлигинен кабарлашкандай, Жаштар иштери, дене тарбия жана спорт мамлекеттик агенттигине аялдар күрөшү залын куруу үчүн жер тилкеси бөлүнүп берилди.

Жер тилкеси Бишкек шаарындагы "Ата-Түрк" сейил багынын жанындагы "Жаштык" дирекциясынын аймагынан бөлүндү.

"Жашыл көчөт курчаган аймакты кошуу менен, бөлүнгөн аянттын жалпы аянты 800 чарчы метрди түзөт. "Жаштык" дирекциясынын аймагына зал куруунун максатка ылайыктуулугу - дирекцияда бассейни бар спорт комплексинин иштеши, спортчулардын машыгуу процесси толук кандуу болору менен негизделет.

Учурда Архитектура, курулуш, турак жай-коммуналдык чарба мамлекеттик агенттиги аялдар күрөшү залынын долбоорун, ошондой эле архитектуралык-пландоо шарттарын жана инженердик-техникалык шарттарын иштеп чыгууга киришти. Ал эми залдын курулушуна керектүү документтер даярдалып, бекитилип бүткөн соң аялдар күрөшү залынын куруу иштери башталат.

Алгачкы сметалык баасы 43 миллион сомду түзөт. Объекттин курулушунун акыркы сметалык баасы залдын сметалык эсебинен кийин белгилүү болот", - дешти мекемеден.

Залдын курулушун Архитектура, курулуш жана турак жай-коммуналдык чарба мамлекеттик агенттиги жүргүзөт. Объекттин курулушу аяктап, пайдаланууга берилгенден кийин Жаштар иштери, дене тарбия жана спорт мамлекеттик агенттигинин балансына өткөрүлөт деп кошумчалашты маалымат кызматынан.