Орусияда полиция кызматкерлери тарабынан белгисиз жарандын сабалышы: Тышкы иштер министрлиги үн катты

Кыргыз өлкөсүнүн Орусиядагы элчилиги полиция тарабынан сабалган белгисиз жарандын окуясы боюнча териштирүү иштерин жүргүзүүдө. Бул тууралуу Тышкы иштер министрлиги кабарлады.

"Учурда элчилик окуянын чоо-жайын тактоо боюнча тиешелүү иштерди жүргүзүүдө. Ошондой эле элчилик Кыргыз Республикасынын жарандарынан жана жалпыга маалымдоо каражаттарынан социалдык түйүндөрдө деструктивдүү мүнөздөгү такталбаган маалыматтарды жана комментарийлерди таркатпоого чакырат.

Ошол эле учурда бул иш боюнча кошумча маалымат берилерин белгилейбиз", - деп жазылат билдирүүдө.

Буга чейин блогер Ринат Усупбаев Орусияда эки полиция кызматкери белгисиз жаранды сабап жаткандагы видеосун социалдык тармактагы баракчасына жүктөп, сабалган адам Кыргыз жараны экенин айтып, Тышкы иштер министрлигине кайрылган.