Ноокатта мыйзамсыз сатылып кеткен жер мамлекетке кайтарылды

Ноокат райондук прокуратурасы тарабынан социалдык инфраструктура объектисинин мыйзамсыз сатылган жер тилкеси муниципалдык менчикке кайтарылды. Бул тууралуу Башкы прокуратура кабарлады.

"2005-жылы "Арал" дыйкан чарбасынын мүчөлөрүнүн жалпы жыйынынын токтому менен Ноокат районуна караштуу Мирмахмудов айыл өкмөтүнүн менчигинде турган "Арал" бала бакчасынын 0,18 га болгон жер тилкеси жеке тарапка мыйзамсыз сатылып кеткендиги аныкталган.

Жерди кайтарып алуу максатында көзөмөл органы тарабынан жогорудагы кыймылсыз мүлккө тиешелүү укук белгилөөчү жана укук күбөлөндүрүүчү документтерди жараксыз деп табуу жөнүндө сотторго доо арыздар келтирилген", - деп билдиришти прокуратурадан.

Соттук кароолордун жыйынтыгы менен прокуратуранын доо арыздары толук канааттандырылган.

Прокурордук чара көрүү актысынын негизинде баасы 3 миллион 75 миң сом болгон 0,18 га аянттагы бала бакчанын жер тилкеси муниципалитеттин балансына кабыл алынды.