"ЭЛДИК КАБАРга" жооп: "Түндүк электр": "5 киловаттан ашырбай колдонсо электр жарыгы өчпөйт"

"ЭЛДИК КАБАР" бөлүмүнө Бишкек шаарынын тургуну кайрылып, электр жарыгы эсептегичтен автоматтык түрдө өчүп калып жатканын айткан. Ошондой эле мындай жагдайды жөнгө салуунун айласы барбы деп суроо салган.

Бул маселе боюнча "Түндүк электр" ишканасына байланышканыбызда, электр энергиясын колдонууда лимит киргизилгенин айтып, жарандарды энергияны үнөмдүү пайдаланууга чакырды.

"Лимитти ашырбай колдонуу керек. 5 киловаттан ашырбай колдонсоңуз электр жарыгы өчпөйт. Мисалы, электр менен иштей турган ар бир техника кайсы бир көлөмдө энергиянын сарптайт. Бир эле убакта бир топ техникаларды электр энергиясына кошкондо 5 киловаттан ашып кетсе, акылдуу эсептегичте жарык автоматтык түрдө өчүрүлүп калат. Ал эми өчкөн убакта акылдуу эсептегичтен күйгүзүп алса болот", - деп билдиришти мекемеден.

Маалымат үчүн:

Буга чейин бир фазалуу колдонуучуларга 5 киловаттык, ал эми үч фазалууларга 10 киловаттык чектөө коюлду. Мындан улам чектөөдөн ашкан колдонуучуларда электр кубаты автоматтык түрдө өчөт.

Ал эми бардык пайда болгон суроолор боюнча төмөнкү номерлерге кайрылса болот:

0772 001209

0702 001209

0556 001209

Белгилей кетсек, "Түндүк электр" Бишкектеги, Чүйдөгү жана Таластагы абоненттерди тейлейт.