Садыр Жапаров көмүр маселеси боюнча түшүндүрмө берди

Президент Садыр Жапаров коомдо талкуу болуп жаткан көмүр маселеси боюнча түшүндүрмө берди. Бул тууралуу президенттин Фейсбуктагы расмий баракчасына жарыяланды.

"Жайлы-жайлай “Кыргызкөмүрдө” саботаж кылышып, көмүр казуу кеч башталды. Муну моюнга алабыз. Бирок саботажга карабай ӨКМнын бардык техникаларын өз убагында жардамга киргизип, көмүр казууну тездетип, үлгүрүп калдык.

Азыр да саботаж уланып жатат. Анткени ал жактагы коррупцияны жок кылып жатабыз. Кандай коррупция деген суроо туулат. Мисалы, "Кара-Кечеден" Балыкчыдагы көмүр кампага унаанын номери менен “баланча унаа менен түкүнчө тонна көмүр келип түштү” деген кагаз эле келет экен. Мөөр басылып, кабыл алынды болот.

Тагыраак айтсам, "воздух" келет. "Воздух" көмүрдүн ордун эмне менен толтурушат экен дебейсиздерби? Балыкчыдагы кампадан кум аралаштырып жиберишет экен. Мына ошентип ЖЭБге алып келгенде "бармак басты, көз кысты" болуп эле өтүп кетип турган. "Кара-Кечеден" баштап ЖЭБге чейинкилер менен кумдан түшкөн пайданы бөлүшүп турушкан. Ошентип ЖЭБ кум аралашкан көмүр жагып жүргөн.

Ушул ишке аралашкан бир канча адам камалышты. Кум аралашкан көмүр жагууну токтоттук. Башка коррупциялашкан иштердин үстүнөн дагы иштеп жатабыз. Кыскасы, чирип калган системаларды тазалап жатабыз", - деп жазган Жапаров.