Токтогул ГЭСинде суунун агып чыгышы эмнеден улам көп болууда? "Электр станцияларынын" жообу

"ЭЛДИК КАБАР" бөлүмүнө окурмандар Токтогул ГЭСинде суунун суткалык агып чыгышы эмнеден улам көп болуп жатат деп суроо салышты.

Бул маселе боюнча "Электр станциялары" ачык акционердик коомуна байланыштык. Алардын айтымында, мындай жагдай эл электр энергиясын көп колдонуп жатканы менен түшүндүрүштү.

"Бул түздөн-түз калк электр энергияны көп колдонуп жатканы менен байланыштуу" дешти мекемеден.

Бүгүн, 11-ноябрга карата Токтогул суу сактагычында суунун көлөмү 11 миллиард 641 метр кубду түздү. Суунун орточо күндүк агып кириши секундасына 174 метр куб болсо, агып чыгышы 510 метр куб болду.

Былтыркы жылы ушул күнү суунун көлөмү 14 миллиард 555 метр куб болгон. Суунун орточо күндүк агып кириши секундасына 196 метр кубду түзсө, ал эми 508 метр куб суу агып чыккан.

2019-жылы ГЭСтеги суунун көлөмү 16 миллиард 872 миллион метр кубдү түзгөнү "Электр станцияларынын" расмий сайтында көрсөтүлөт. Бул жылы суунун орточо күндүк агып кириши секундасына 225 метр кубду түзсө, ал эми суунун агып чыгышы 440 метр куб болгон.

Быйыл былтыркы жылга (ред.: 11-ноябрга карата) салыштырмалуу болжолдуу 3 миллиард метр куб суу аз болсо, 2019-жылга караганда 5 миллиард метр куб суу аз болууда.

Эске салсак, өлкөдө электр энергиясын колдонууда кубаттуулукка чектөө киргизилген. Энергетика министрлиги мындай кадамга баруу Токтогул суу сактагычында суунун көлөмү аз болгондугуна байланыштуу экендигин айтышкан.