Садыр Жапаров Түрк инвестициялык фондун Бишкек шаарында жайгаштырууну сунуштады

"Түрк инвестициялык фондун Кыргыз мамлекетине жайгаштыруу Түрк кеңешинин миссиясына толугу менен жооп берет", - деди бүгүн, 12-ноябрда президент Садыр Жапаров Түркия Республикасынын Стамбул шаарында Түрк тилдүү мамлекеттердин кызматташтык кеңешинин 8-Саммитинде сүйлөгөн сөзүндө. Бул тууралуу президенттик администрацияын басма сөз кызматынан билдиришти.

Мамлекет башчысы Түрк тилдүү мамлекеттердин уюму саясий, соода-экономикалык, маданий-гуманитардык, социалдык-гуманитардык маселелерди талкуулоо менен бирге өз ара карым-катнашыбызды жана байланыштарыбызды, көп тараптуу мамилелерибизди өркүндөтүүгө чоң мүмкүнчүлүктөрдү ачып, эл аралык аренада мыкты платформа болуп берет деген ишенимин билдирди.

"Азыркы экономикалык каатчылыктан бири-бирибизге жөлөк болуп, бири-бирибизге колдоо көрсөтүү аркылуу гана чыгып кетерибизге ишеничибиз чоң.

Бүгүн биздин колдоого алына турган “Түрк инвестициялык фонду” өз ара экономикалык мамилелерибиздин реалдуу инструментине айланып, эки тараптуу жана көп тараптуу долбоорлорду ишке ашыруунун механизми катары чоң ролду ойнойт.

Биздин мамлекетте түрк уюмдарынын жоктугун эске алып, бул финансылык институтту - Түрк инвестициялык фондун Бишкек шаарында жайгаштырууну ылайык көрөбүз", - деди ал.

Мамлекет башчысы белгилегендей, фондду Кыргызстандын борборунда жайгаштыруунун финансылык гана эмес, саясий да мааниси бар.

"Кыргыз-Түрк кеңешинин негиздөөчүлөрүнүн бири. Ал эми биздин кеңешибиздин негизги документтеринде тең укуктуулукту сактоого жана урматтоого чоң маани берилген", - деди Садыр Жапаров.