Сузакта иске ууланып каза болгон эгиздер жана алардын бир тууганынын сөөгү жерге берилди. Атасы Орусиядан келди

Жалал-Абад облусунун Сузак районунда 3 баласы менен кошо иске ууланган келиндин жолдошу акыркы 2 жылдан бери Орусияда иштеп жүргөн. Бул тууралуу SUPER.KG порталына Сузак районунун Кызыл-Туу айылынын айыл өкмөт башчысы Майсалбек Өмүрзаков билдирди.

"Келиндин жолдошу 2019-жылы Орусияга иштегени кеткен. Ал бүгүн түштө келди, андан соң балдардын сөөгү жерге берилди. Келин кайната-кайненеси менен бирге турат. Болгону алар эки үйдө жашашат. Келин жаңы салынган үйгө ошол күнү балдары менен уктаган. Ал жаккан мешке дагы от биринчи жолу жагылган.

Бир жыл мурун дагы айылда 2 баласы менен келин иске ууланып каза болгон. Бүгүн райондо чогулуш болуп, айыл тургундарына түшүндүрүү иштери жүрүп жатат", - деди Өмүрзаков.

Кечээ,14-ноябрь күнү таңга жуук эне жана анын 3 баласы мештен чыккан иске ууланган. Анда каза болгон балдардын экөө төрт жаштагы эгиздер жана бирөө 6 жашта болгон. Ал эми балдардын апасы өтө оор абалда аймактык ооруканага жаткырылган.

Ал эми бүгүн, 15-ноябрь күнү эртең менен облустук ооруканадан келин комадан чыгып, абалы турукташа баштаганын билдирген.