Бишкекте пневмония, курч респиратордук вирустук инфекция менен ооруган балдардын саны өсүүдө

Бишкекте курч респиратордук вирустук инфекция, сасык тумоо жана пневмония менен ооруган балдардын саны өсүүдө. Буга байланыштуу борбор калаадагы бардык үй-бүлөлүк дарыгерлер борборлору дем алыш күндөрү да иштөөгө өттү. Бул туурасында бүгүн, 15-ноябрда Бишкек шаардык мэриясынан кабарлашат.

"Шаардык саламаттыкты сактоо башкармалыгынын токтомуна ылайык, үй-бүлөлүк дарыгерлер борборлору ишемби күндөрү саат 08:00дөн 16:00гө чейин, жекшемби күндөрү саат 08:00дөн 14:00гө чейин иштейт.

Күнүнө орто эсеп менен алганда, үй-бүлөлүк дарыгерлер борборлоруна 200дөн 500гө чейин бейтап кайрылууда.

Акыркы күндөрү стационарларга кайрылгандардын саны өсүп жатат. Узап кеткен дем алыш күндөрү шаардык балдар ооруканасына 1 миң 370 бала кайрылып, 102си ооруканага жаткырылды. Анын ичинен курч респиратордук вирустук инфекция менен 39, пневмония менен 39 бала жабыркаганы аныкталды", - дешет мекемеден.

Бишкек шаардык мэриясы жарандарга кайрылып, дарыгерлерге убагында кайрылууга, өз алдынча дарыланбоого чакырат.