7 адамдын өмүрү кыйылган кырсык. Ооруканага 15 адам жеткирилген, 2 наристенин абалы оор

Бүгүн, 16-ноябрда Ош облусунун Кара-Суу районунун Бишкек-Ош унаа жолунда КамАЗ менен Mercedes-Benz Sprinter жана Daewoo Nexia унааларынын катышуусунда жол кырсыгы катталып, 7 адам каза болгон.

Кырсыктын кесепетинен 22 адам жабыркап, алардын ичинен жетөө каза болду. Бул тууралуу Саламаттыкты сактоо министрлигинин басма сөз кызматынан билдиришти.

"Ош облустук ооруканасына жаракат алган 15 адам жеткирилген. Азыркы учурда жандандыруу бөлүмүндө 7 адам жатат. Алардын абалы оор. Ал эми травматология бөлүмүндө 2 жабырлануучу жаткырылган, абалдары орто.

Шаардык ооруканага бир жаран жаткырылган, абалы орто. Ош облустук балдар ооруканасына 2 наристе жаткырылган. Алардын абалы оор. Дагы 3 жаранга амбулатордук жардам берилди", - деп билдирет басма сөз кызматынан.