"Кыргыз көмүр" ишканасы: "Арзан көмүр аймактарга дагы жеткирилет"

Кара-Кече көмүр кенинде абал туруктуу. Бул тууралуу "Кыргыз көмүр" ишканасына байланышканыбызда билдиришти.

Алардын айтымына караганда, Кара-Кечеде ызы-чуу болуп жатат деген маалыматтар тараган. Бирок аталган аймакта кар жок, аба ырайы жакшы.

"Айдоочулар көмүрдү 3 миң сомдон сатып жатканына нааразы болуп жатышат. Себеби алар бир каттамда 150 миң сомго көмүр сатышчу. Анын ичинен таза киреше 80 миң сомдун айланасында болчу. Киреше таппай калабыз деген таризде өздөрүнүн оюн айтышууда. Бирок 3 миң сомдон сатылчу көмүр үчүн "Кыргыз көмүр" 100 унаа көмүрдү Бишкек шаарына жеткирип арзан баада сатып жатабыз. Муну менен гана чектелбейбиз, республиканын башка региондоруна жана Бишкек шаарынын башка жактарына дагы көмүр кампаларды ачып, арзан көмүр жеткиребиз.

Элге арзан баада көмүр жеткирүү үчүн бардык иш-аракеттерди жасап жатабыз", - дешти "Кыргыз көмүр" ишканасынан.

Маалымат үчүн:

16-ноябрда Бишкек шаарында бир тонна көмүр Мурманская көчөсү, 1б/1 дарегинде 3 миң сомдон сатылып баштаган. Буга удаа эле борбордо көмүр алабыз дегендердин саны арбын болгондуктан кошумча көмүр сатуучу кампа ачылды.

Өлкө башчы Садыр Жапаров Бишкек шаарындагы ЖЭБ-2 аймагындагы конуштун жашоочулары менен жолугушкан учурда көмүрдүн баасы 3 миң сом болорун айткан.