Жаш окумуштуулар Элбашынын Түрк дүйнөсү интеграциясын чыңдоодогу ордун талкуулашты

19-ноябрда Нур-Султан шаарында "Элбашы - түрк дүйнөсү интеграциясынын архитектору" аттуу түрк тилдүү мамлекеттердин жаш окумуштууларынын илимий-практикалык онлайн конференциясы өттү. Бул тууралуу Эл аралык Түрк академиянын Кыргыз мамлекетиндеги өкүлү Нурдин Усеев SUPER.KG порталына кабарлады.

"Эл аралык Түрк академиясы менен Казакстан Республикасынын Маалымат жана коомдук өнүгүү министрлиги өткөргөн бул жыйынга Түрк академиясынын президенти Дархан Кыдырали, маалымат жана коомдук өнүгүү министринин орун басары Аскар Омаров, Эл аралык Ахмет Йессеви университетинин президенти Жанар Темирбекова, Нурсултан Назарбаев фондунун аткаруучу директорунун орун басары Алкей Маргуланулы, Бозок Университетинин профессору, Башкаруу жана экономика илимдери факультетинин деканы Күршад Зорлу, Казакстан, Азербайжан, Түркия, Татарстан, Башкортостан , Кыргыз мамлекети, Өзбекстан, Монголия мамлекеттеринин таанымал жаш окумуштуулары катышты. Конференция "Илим жана билим берүү", "Экономика жана транзит", "Түркология" деген темаларда секциялык ишин улантты" - деди Нурдин Усеев.

Эскерте кетсек, Эл аралык Түрк академиясы - Кыргыз өлкөсү, Казакстан, Түркия жана Азербайжан мамлекеттеринин расмий орток илимий, маданий академиясы. Аталган мамлекеттердин илимине, түрк дүйнөсүнүн биримдигине, өнүгүп-өсүшүнө кызмат кылган эл аралык уюм.