Япония атайын долбоордун алкагында Кыргыз өлкөсүнүн 2 миңге чукул мектебине 4 миллион доллар бөлдү

ЮНИСЕФтин Европа жана Борбордук Азия боюнча аймактык директору Афшан Хан жана Япониянын Кыргыз жергесиндеги элчиси Шигеки Маэданын катышуусунда Бишкек шаарындагы №9 билим берүү мектебинде "Балдардын климатка жана жаратылыш кырсыктарынын тобокелчиликтерине туруктуулугун жогорулатуу" программасынын алкагында иш-чара өткөрүлдү.

Бул долбоор жакында эле башталды жана 3 жылга созулат. Аны Япония мамлекети каржылап 4 миллион доллар бөлгөн. Аталган долбоор өлкөнүн Билим берүү жана илим министрлиги, Өзгөчө кырдаалдар министрликтери менен биргеликте, ошондой эле ЮНИСЕФтин ыктыярчыларынын программалары менен ишке ашырылып жатат. Ага республика боюнча 1800 мектепте 1 миллион окуучу камтылат.

Иш-чаранын алкагында мектеп окуучулары ЮНИСЕФ ыктыярчыларынын жана мектеп администрациясынын жетектөөсүндө өзгөчө кырдаал жана климаттык катастрофа учурундагы эрежелерди демонстрациялап, коопсуз кылып көрсөтүп беришти.