Президенттин учагы эскиргендиктен жыл сайын көп чыгымды талап кылынары айтылды

Кыргыз өлкөсүнүн президентин ташыган учак эскирген. Бул туурасында Транспорт жана жолдор министрлигинин алдындагы Жарандык авиация агенттигинин директору Александр Настаев брифингде айтты.

Брифингде Настаевден президентке качан жаңы лайнер берилерин сурашты.

"Жарандык авиация агенттиги чарбалык субъект болуп эсептелбегендиктен №1 учагын качан алмаштыруу керектигин аныктай албайт. Президенттин учагы эскиргендиктен, анын учууга жарамдуулугун жана учуу коопсуздугун сактоо үчүн жыл сайын көбүрөөк чыгым талап кылынат. Учакты алмаштыруу боюнча маселени аны иштеткен авиакомпания жакшы билет", - деп жооп берди Настаев.

Ал өлкөнүн расмий делегацияларын ташуу менен "Эйр Кей Джи" авиакомпаниясы алектенерин кошумчалады.

Айта кетсек, Садыр Жапаровдун Глазгого (Улуу Британия) болгон сапарында президенттик администрация бизнес-класстагы менчик Embraer Lineage 1 000 учагын ижарага алган. Өлкө башчысын ташыган №1 борт (Ту-154) Евробиримдиктин жана Улуу Британиянын техникалык нормаларына дал келбегендиктен, ушундай кадам жасалганы айтылган.